4 មេសា 2020

ខ្ញុំសប្បាយចិត្តណាស់ដែលបានឃើញមិត្តៗគាំទ្រប្លុករបស់ខ្ញុំ

ដើមទ្រូង ៥ ហត្ថ

                                       ការអប់រំ, ទូទៅ |

ចាស់បុរាណ​តែងតែ​និយាយ​ប្រាប់កូន​ចៅថា ​« មនុស្ស​ប្រុស​បើមិន​បួស​ គឺមិន​ពេញលក្ខណៈ​ជាបុរស​មាន​ដើម​ទ្រូង​៥ហត្ថទេ ​។ តើអត្ថន័យនេះយ៉ាងណា?

ដើមទ្រួង៥ហត្ថមានអត្ថមានអត្ថន័យសំខាន់២យ៉ាងគឺ៖

             ទី១-អ្នកបួស​ជាភិក្ខុភាវៈ​ក្នុងព្រះពុទ្ធ​សាសនា​មានបរិក្ខា​ ៨​
                          (អដ្ឋបរិក្ខា)​សម្រាប់​ប្រើប្រាស់​គឺ​៖

    ១-ស្បង់សំពត់សម្រាប់ស្លៀក

    ២-ចីពរ សំពត់សម្រាប់បិតបាំងរាងកាយ

   ៣-សង្ឍាជី សំពត់សម្រាប់ដណ្តប់ការ​ពាររងារ​(សង្ឃា​ដីដេរ​ត្រួតគ្នា ​២ ​ជាន់​

   ៤-​វត្ថពន្ធ​ចង្កេះ ​សំពត់សម្រាប់​ក្រវ៉ាត់​ពីលើ​ស្បង់​កុំឱ្យរបូត​ (ខ្សែក្រវ៉ាត់)

   ៥-បាត្រ​គឺជាសំភារៈ​ ឬជា​ឆ្នាំងសម្រាប់​ទទួលចង្ហាន់​ពី​ទាយកទាយិកា

    ៦-កាំបិតកោរ ​(ក្នុងពុទ្ធវិន័យ​ផ្នែកអភិសមាចារ​អនុញ្ញាតឱ្យ​ព្រះសង្ឃទុក​សក់ត្រឹម​រយៈពេល​ ២​ ខែ ​គឺប្រវែង​ត្រឹម២ធ្នាប់​ បើទុក​ឱ្យលើស​ពីនេះទៅទៀត​នេះនឹង​ត្រូវ​អាបត្តិទុក្កដ)។​

    ៧-បំពង់ម្ចុល​សំភារៈ​សម្រាប់ដាក់ម្ជុល​ និង​ អំបោះ​ដេរប៉ះ​សំលៀក​បំពាក់ផ្ទាល់ខ្លួន​

     ៨-​តំរងទឹក​ប្រដាប់ត្រង​ទឹក​ ការពារមិន​ឱ្យសត្វមាន​ជីវិតឬកករ​សម្រាម​ចូលក្នុងទឹកដែល​ត្រូវយក​មកប្រើប្រាស់​។

                ដើម្បី​រក្សាបរិក្ខារ​ទាំង​ប៉ុន្មាន​ឱ្យមាន​សណ្តាប់ធ្នាប់​ ពិសេស​ត្រៃចីវរ​មិនឱ្យ​រយីករយាគ​ និងមាន​បរិមណ្ឌល ​ត្រឹមត្រូវនៅ​ពេលធ្វើ​សង្ឃកម្ម​ចាំបាច់ត្រូវ​ប្រើបរិក្ខារ​មួយផ្សងទៀតគឺ​«វត្ថពន្ធទ្រូង»​ ដែល​មានបណ្តោយ​ប្រវែង៥​ហត្ថ​ទទឹង​ប្រមាណ​០.៨០ម​ មកចង​ក្រវ៉ាត់ត្រឹម​ដើមទ្រូង​។​ ត្រង់នេះ​ហើយ​គេហៅថា​ដើមទ្រូង​ ៥ ​ហត្ថ ​ជាន័យត្រង់​ ព្រោះសម័យបុរាណ​ មិន​មាន​សាលារៀន​ ក្រៅពីវត្ត​អារាម​ និង​ ក្នុង​ព្រះបរមរាជវាំង​ទេ ​។ ​អ្នកបួស​គឺជាអ្នក​ស្រឡាញ់​ការសិក្សា​ អ្នកបួស​ពេលចាក​ផ្នួសមក​ប្រជាជន​មានការ​គោរពរាប់​អានដែល​គេនិយម​ហៅថា​អន្ទិត(បណ្ឌិត)​ មានន័យថា​មានអ្នក​ដឹងការ​រាក់ជ្រៅ​ ជាអ្នក​មានកាយ​វាចា​បាន​អប់រំល្អ​។​

          ទី២-មនុស្សប្រុស​ដែល​ជាមនុស្ស​ប្រុសពិត​ប្រាកដ​ 
                    ត្រូវមាន​អង្គលក្ខណៈ​ ៥ ​យ៉ាងគឺ៖​

    ១-​វិជ្ជាបរិបូរណ៌​ដោយ​ចំណេះដឹង​ ​ចំណេះធ្វើ​ ​យ៉ាងហោច​ណាស់ក៍ត្រូវ​មានមុខវិជ្ជាជីវៈ​ណា​មួយ​សម្រាប់​រស់ដែរ​(សម្មាអាជីវោ)​។

    ២-ចរិយា​សម្បត្តិ​បរិបូរណ៌​ដោយ​ចរិយាធម៌ ​សីលធម៌​ល្អដែល​សង្គមរាប់រក​

    ៣-មានភាព​ជាទីសង្ឃឹម​កក់ក្តៅ​នៃមាតាបិតា​ ​មិនធ្វើឱ្យ​មាតាបិតា​មានទុក្ខ​លំបាក​ មាន​វិបដិសារៈ​។

     ៤-​ភាពជាស្វាមី​ដ៍ល្អរបស់​នារីណាមួយ​

     ៥-ស្នេហា​មាតុភូមិ​ ស្រឡាញ់ទឹក​ដីព្រៃព្រឹក្សា​ស្រុកកំណើត​ប្រទេស​របស់ខ្លួន​។

ប្រកប​ដោយអង្គ​ លក្ខណៈ​ ៥​ យ៉ាងនេះដូចរៀប​រាប់ខាងលើ​ទើបពេញ​ជាមនុស្ស​មានដើមទ្រូង​៥ហត្ថ។

               កំណាព្យបុរសដើមទ្រូង ៥ ហត្ថ

១-ដើម្បីចងចាំកុំឲ្យភ្លេច               សូមឈ្លេចឆ្កឹះយកមកចងក្រង
ជាកាព្យបែបខ្លីក្នុងបំណង            ជូនបងប្អូនខ្លះចែកគ្នាដឹង។

២ “ប្រាំហត្ថ”ពីរម៉ាត់ន័យទីមួយ      ឧបករណ៍ចាំជួយទប់លំនឹង
ចងភ្ជាប់ចីវឲ្យស្ងៀមទ្រឹង               បរិមណ្ឌល(១)រឹងមិនរបូត។

៣-ប្រាំហត្ថ“វត្ថពន្ធទ្រូង”នេះឯង         គឺតែងតាមជាប់សង្ឃរហូត
ភិក្ខុសាមណេរបួសរៀនសូត្រ           ចិត្តស្លូតបូតយកចំណេះដឹង។

៤ ដោយសម័យមុនការបួសរៀន         ជាយាន្តខុសពីសម័យហ្នឹង
បួសសង្ឃរៀនសូត្រចំណេះភ្លឹង           អីចឹងទើបគេហៅ“ប្រាំហត្ថ”។

៥ ប្រាំហត្ថ នៅមានន័យមួយទៀត        ដែលគួរតែឆ្លៀតប្រតិបត្តិ
ឲ្យចំពាក្យថាទ្រូងប្រាំហត្ថ                    ម៉ឺងម៉ាត់ធ្វើជូនអ្នកមានគុណ។

៦ ទីមួយចិញ្ចឹមពួកគាត់វិញ                 ទោម្នេញលុបចេញត្រូវទន់ភ្លន់
ឲ្យដូចពេលលោកធ្វើលើកមុន            គឺទន់ភ្លន់ណាស់ចំពោះកូន។

៧ ទីពីរនាំគ្នាជួយការងារ                     នាមជាកូនល្អមិនសាបសូន្យ
បណ្តុះសាមគ្គីញាតិបងប្អូន                  រុញក្បួនសេដ្ឋកិច្ចឲ្យទៅមុខ។

៨ ទីបីរក្សាត្រកូលខ្លួន                        ឲ្យរឹងមាំមួនផុតគគ្រក់
តម្លៃគ្រួសាររក្សាទុក                          ម៉ែពុករីយរាយលែងវិប្បយោគ។

៩ ទីបួនធ្វើខ្លួនឲ្យសមជា                    អ្នកថែទ្រព្យាមរតកលោក
បង្កើតបន្ថែមមិនគេងឈ្ងោក             និងយោគសល់គ្នាក្នុងវង្សផៅ។

១០ ទីប្រាំបើគាត់ចែកឋានទៅ            កុំនៅលាក់លៀមបៀមចិត្តខ្មៅ
ធ្វើបុណ្យជូនគាត់កុំហ្មងសៅ              នេះហៅថាកួន“ទ្រូងប្រាំហត្ថ”។

១១ ពាក្យប្រាំហត្ថនេះន័យទូលាយ       និយាយរាប់រៀបបានច្រើនម៉ាត់
កូនប្រុសឬស្រីប្រុងប្រយ័ត្ន                     គួរចាត់ទុកវាជាចំណាំ៕

 ​ប្លុកវត្តអូរត្រាវ ទី៣១-៨-២០២០

ថ្ងៃទី ១៩ ខែ កញ្ញា ឆ្នាំ ២០១២
យ៉េង ឈាងលី

  ដំណឹងអនិច្ចធម្ម

សមាគមព្រះសង្ឃសាមគ្គីស្នេហាជាតិស្រុកយ្វៀងហាយ-ព្រះសង្ឃគណៈកម្មការចំណុះវត្តសត្ថារាមវ័ន តារ៉ម មានទុក្ខជាទម្ងន់ចំពោះ ព្រះឧបជ្ឈាយ៍ បិយធម្មោ គឹមសុខ កើតឆ្នាំរោងត្រីស័ក ព.ស ២៤៩៥ - គ.ស ១៩៥១

ព្រះចៅអធិការវត្តសត្ថារាមវ័ន តារ៉ម និងជាព្រះឧត្តមប្រឹក្សា សមាគមព្រះសង្ឃសាមគ្គីស្នេហាជាតិស្រុកយ្វៀងហាយ ។

ព្រះអង្គទ្រង់អនិច្ចធម្ម នៅវេលា ម៉ោង ១១៖៣៥នាទី ថ្ងៃព្រហស្បតិ៍ ៩កើតខែភទ្របទ ឆ្នាំជូតទោស័ក ព.ស ២៥៦៤ ត្រូវនិងថ្ងៃទី២៧ខែសីហា គ.ស ២០២០ គម្រប់ជន្មាយុ ៦៩ព្រះវស្សា ព្រះវស្សាផ្នួស បាន៥៣ព្រះវស្សា

កម្មវិធីបុណ្យ

៚ថ្ងៃព្រហស្បត៌៍ ៩កើតខែភទ្របទ ឆ្នាំជូត ទោស័ក ព.ស២៥៦៤ ត្រូវនិងថ្ងៃទី២៧ខែសីហា គ.ស២០២០ រសៀលម៉ោង ៥៖០០នាទី អារធនាព្រះសពតម្កល់ ចូលកាន់មឈូសនិងសិស្សគណប្រតិបត្តិខមាទោសគោរពព្រះវិញ្ញាណក្ខន្ធ។

ពេលរាត្រី ប្រារព្ធសាសននិយមកិច្ច។

៚ថ្ងៃសុក្រ ១០កើតខែភទ្របទ ឆ្នាំជូត ទោស័ក ព.ស២៥៦៤ ត្រូវនិងថ្ងៃទី២៨ខែសីហា គ.ស ២០២០។

ស្វាគមន៍ព្រះសង្ឃ ពុទ្ធបរិស័ទ ចូលរួមរំលែកទុក្ខ និងគោរពព្រះវិញ្ញាណក្ខន្ធ

ពេលរាត្រី ប្រារព្ធសាសននិយមកិច្ច សំដែងព្រះធម៌ទេសនានិងព្រះបរិត្ត ។

៚ថ្ងៃសៅរ៍ ១១កើតខែភទ្របទ ឆ្នាំជូត ទោស័ក ព.ស២៥៦៤ ត្រូវនិងថ្ងៃទី២៩ខែសីហា គ.ស២០២០។

ស្វាគមន៍ព្រះសង្ឃ ពុទ្ធបរិស័ទ ចូលរួមរំលែកទុក្ខ និងគោរពព្រះវិញ្ញាណក្ខន្ធ

ពេលរាត្រី ប្រារព្ធ សាសននិយមកិច្ច សំដែងព្រះធម៌ទេសនានិងពុទ្ធាភិសេក។

៚ថ្ងៃអាទិត្យ ១២កើតខែភទ្របទ ឆ្នាំជូត ទោស័ក ព.ស២៥៦៤ ត្រូវនិងថ្ងៃទី៣០ខែសីហា គ.ស ២០២០។

ស្វាគមន៍ព្រះសង្ឃ ពុទ្ធបរិស័ទ ចូលរួមរំលែកទុក្ខ និងគោរពព្រះវិញ្ញាណក្ខន្ធ។

ម៉ោង១៤រសៀល ពិធីបង្សុកូល អារធនាព្រះសព ប្រទក្សិណជុំវិញព្រះវិហាររួចតម្កល់លើព្រះមេន ម៉ោង៩ ធើ្វវិធីថ្វាយព្រះភ្លើង។

៚ព្រឹកថ្ងៃច័ន្ទ១៣កើតខែភទ្របទ ព.ស ២៥៦៤ ម៉ោង៨៖០០នាទី ពិធីរើសធាតុបង្សុកូលបញ្ចប់កម្មវិធី៕

គណៈកម្មការបុណ្យ

សូមប្រគេននិងជូនដំណឹង
សេចក្តីកម្មវិធីបុណ្យនេះអាចារ្យនាម ឡាង​ជាអ្នកសរសេរ
រូបភាពបុណ្យព្រះសពព្រះឧបជ្ឈាយ៍នេះខ្ញុំស្រង់ចេញពីFBជាច្រើន
យកមកដាក់ក្នុងBloggerរបស់ខ្ញុំ។

មឈូសបូរាណ

ស្រោមមឈូសនេះ កសាងឡើងក្នុងឆ្នាំ១៩៥០ ដោយស្នាប្រហត្ថ 

អតីតព្រះឧបជ្ឈាយ៍ សុវណ្ណសត្ថា គឹមកែវ វត្តចេតិយ

 ហើយបានប្រើប្រាស់បាន ៣ លើក គិតមកដល់បច្ចុប្បន្នគឺ:

_ ឆ្នាំ១៩៧៥ ដម្កល់ព្រះសព ព្រះឧបជ្ឈាយ៍ សុវណ្ណសត្ថា គឺមកែវ.

_ឆ្នាំ ២០១១ ដម្កល់ព្រះសព ព្រះឧបជ្ឈាយ៍ កេសរប្បញ្ញា គឺមណើយ។

_ បច្ចុប្បន្នបានយកទៅដម្កល់ព្រះសព ព្រះឧបជ្ឈាយ៍ បិយធម្មោ គឹម សុខ វត្តតារ៉ម។

Áo kim quang cổ này được xây dựng điêu khắc bằng tay

 của các nghệ nhân năm 1950 tính đến thời điểm này tròn 70 năm và sử dụng được 3 lần.

_ Lần 1 năm 1975 đặt kim thân Hoà thượng Kim Keo chùa chêdey ( chùa tháp)

_ Lần 2 năm 2011 đặt kim thân Hoà thượng Kim Nơi chùa tháp.

Lần 3 là hiện tại được tái sử dụng đặt kim thân Hoà thượng Kim Sóc chùa Tà Rom.

សិស្សគណស្រណោះ        

ម្លប់ពោត្រជាក់ស្លឹករងកម្តៅ                   សូទ្រាំដំបៅហ្មងសៅជីវិត    

ដោយក្តីសន្តោសរស់ឈឺមិនគិត               ព្រះទ័យប្រណិតនឹកគិតកូនចៅ ។

លះកាត់ទ្រង់ផ្នួសបួសស្មោះប្រពៃ           វស្សា៥៣គ្មានក្តីហ្មងសៅ

ព្រះជន្ម៧០រងគ្រោះខុសត្រូវ                 ដឹកដៃនាំផ្លូវដើរទៅរកសុខដុម។

បិយធម្មោគឹមសុខព្រះឧបជ្ឈាយ៍              បណ្តោសពូជធាសីមាតារ៉ម

ពោពេញគុណធម៌បវរឧត្តម                   មានសិស្សចោមរោមមានដល់៩វត្ត ។

សិស្សគណចំណុះឧប្បមានភ័ព្វវាសនា       បានទ្រង់ធម៌អាថ៍រក្សាសង្វាត

ក្រោមការបំបួសនៃគុណប្រាកដ              តែងស្តាប់ឧវាទដុះខាតចិត្តកាយ ។

ទីមួយវត្តធំទ្រនំព្រៃឈើម្លប់                   ២វត្តប្រខុប៣ស្លាប៉ាងឆោមឆាយ

៤វត្តត្រពាំងឈូកកំសត់ផ្លូវឆ្ងាយ              ៥ពិតនិស្ស័យវត្តខ្នាច់ទទឹង ។

៦វត្តដំបងពាក់ ៧វត្តជ្រៃតាសូ                ៨វត្តមេរងថ្មីស្រស់កែវព្រលឹង

៩វត្តតារ៉មកន្លែងទីពឹង                         ប្រះឧបជ្ឈាយ៍នឹងគឺព្រះសព ។

ចំណុះឧប្បនៃព្រះតេជគុណបិយធម្មោ គឹមសុខ វត្តតារ៉ម មាន៩វត្ត

១.ប្រខុប ២ វត្តធំ ៣.វត្តត្រពាំងឈូក ៤.វត្តជ្រៃតាសូ

៥. វត្តខ្នាចទទឹង ៦.វត្តដំបងពាក់ ៧.វត្តស្លាប៉ាង

៨.វត្តមេរងថ្មី ៩.រួមវត្តតារ៉ម
សេចក្តីនេះអាចារ្យនាម ឡាង​ជាអ្នកសរសេរ